Hai ollos que gardan máis dunha vida. Os de Benedicta Sánchez levan dentro a infancia no Corgo, a emigración, quince anos detrás dunha cámara fotográfica e, tamén, aquela sorpresa que chegou cando xa cumprira 84 anos e o cine chamou á súa porta con O que arde. Este mércores, eses ollos volveron falar, brillantes e emocionados, no parque de Frigsa. Alí, no marco da XLVIII Semana de Cine de Lugo, viron como a actriz pasaba a formar parte do Paseo do Cine, onde queda inmortalizada para a posteridade.

"Estou moi agradecida, non sei que fixen para merecer un recoñecemento así", dixo a corguesa mentres as súas mans, endurecidas polo paso das décadas, deixaban ao descuberto o seu rostro gravado no bronce. Aos seus 91 anos, recoñeceu que "non había palabras suficientes" para expresar o que significaba aquel momento para ela, que foi unha nena que só soñaba con poder estudar mentres coidaba das ovellas.

Benedicta ocupa xa o número 17 do que ben se podería considerar o paseo da fama lucense. Unha cifra que lle trouxo á memoria aquel outro 17, o da idade coa que casou e marchou a vivir a Brasil. "Parece que ese número está feito para acompañarme na vida", comentou.

Xulio Xiz, do Grupo Fotocinematográfico Fonmiñá, reivindicou a "xustiza" dunha homenaxe que vai máis alá do éxito acadado por quen nunca se imaxinou como actriz. "O que recoñecemos dela tamén é o seu interior, o seu talante, o seu ser e o seu estar", explicou. Unha maneira de poñer en primeiro plano á muller que hai detrás da profesional e que resumiu cunha frase: "Se non existise, teríamos que inventala".

O alcalde do Corgo, Felipe Labrada, destacou a importancia que ten para o municipio a proxección acadada pola intérprete. "Converteuse nun referente para toda a provincia lucense e, por que non, para toda Galicia", afirmou, antes de expresarlle o seu agradecemento por levar "o nome do seu lugar natal por todo o mundo". O rexidor asegurou que están "orgullosos" de tela como veciña e mostrouse convencido de que o da Semana do Cine de Lugo "non será o último tributo" que reciba.

"Benedicta demostrounos a todos que a idade nunca é un impedimento para facer absolutamente nada. Só hai que ter vontade para facelo", reivindicou a deputada de Cultura, Iria Castro

Na mesma liña, a deputada de Cultura, Iria Castro, reivindicou o exemplo dunha muller "libre" que xa superaba os 80 anos cando deu o salto á gran pantalla e acabou recibindo o Goya á Mellor Actriz Revelación en 2020 polo filme do naviego Oliver Laxe. "Benedicta demostrounos a todos que a idade nunca é un impedimento para facer absolutamente nada. Só hai que ter vontade para facelo".

O concelleiro de Cultura, Javier Vázquez Prado, quixo lembrar unha anécdota persoal coa corguesa no nomeamento dos Cabaleiros e Damas da Orde Serenísima da Alquitara de Portomarín de 2022. Alí compartiron mesa e el mesmo chegou a coller unha guitarra para cantarlle 'Malagueña salerosa'. "Hoxe, que debería entonar 'Corguesa salerosa', é toda unha honra vela converterse en parte da historia de Lugo e da propia cita cinematográfica", afirmou.

Ao rematar a homenaxe, Benedicta quedou en Frigsa rodeada de admiradores. Foron moitos os que se achegaron para pedirlle unha fotografía, e a actriz posou con todos, sorrindo e agradecendo cada mostra de agarimo. O acto pechouse cun "Viva Benedicta!" e ela, sen dubidalo, devolveu o cariño coa mesma moeda: "Que viva Lugo!".

Fonte: El Progreso